tulog

ang daya mo. tinulugan mo na naman ako. nagkukwentuhan lang tayo kanina, ah! sabay din tayong kumain. ipinagluto pa kita ng paborito mong lucky me instant pansit canton with toyomansi kase mas gusto mong kumain nun kesa sa tinatawag mong sinigang na "buto". ang lakas mo sa'kin, 'noh? nagulat pa 'ko kaninang pagdating ko galing sa office dahil nandito ka sa bahay. hinihintay mo ba talaga 'ko? sige, iisipin ko na lang na hinintay mo talaga ang pagdating ko. masarap atang isipin na ganun nga!

masama ang pakiramdam ko kanina pero ewan ko ba... pagkakita ko pa lang sa'yo, nawala na agad ang pagod ko. kahit maysakit ako, bigla akong gumagaling. may magic yata yang mga kamay mo, eh. isang hawak lang, biglang ok na 'ko. hinatian mo pa 'ko kanina ng poncan mo. hindi ka pumayag na hindi kita saluhan. tinakot mo pa 'kong hindi mo kakainin yun pag hindi ko kinain yung kalahati na bigay mo. sabi ko na nga ba, mahal mo ko, eh.

alam mo, sanay ako sa puyatan. madamot ang antok sa'kin. madalas akong hindi nakakatulog sa gabi. pero mas ok palang mapuyat habang pinapanood ang pagtulog mo. ang cute mo talaga habang natutulog. may mga sandali pang napapangiti ka. napapanaginipan mo ba 'ko? uy... aminin.

haayyy... bakit nga ba mahal kita? siguro, hindi mo maiintindihan sa ngayon kapag sinabi ko yung nararamdaman ko para sa'yo. ano ba'ng meron sa'yo? a, ewan! basta! ang alam ko, masaya ako kapag kasama kita. kapag naririnig ko yung tawa mo. kapag nakikita ko 'yung ningning sa mga mata mo. masarap ka kasing kasama. madali ka lang patawanin. madaling pasayahin. walang kahirap-hirap i-please.

ok nang ganito na lang muna. tsaka ko na sasabihin sa'yong mahal kita, kapag sigurado na 'kong maiintindihan mo kung ano ang ibig kong sabihin. kalabisan nga sigurong hilingin na sana, sa'kin ka na lang. dapat makuntento na lang ako kung ano tayo ngayon. basta, dito ka lang, ha? wag ka munang mawawala.

sa palagay ko, wala ngang tulugan 'to. hindi ko talaga maiwasang tumingin sa'yo. pwede bang dito ka na lang ulit matulog bukas?


- para kay ipe